عدد الرسائل : 39 العمر : 36 تاريخ التسجيل : 06/02/2007
موضوع: حكاية حلموس ابن ابو حلموس الأربعاء فبراير 21, 2007 8:38 am
حاحكي لكم حكاية حلموس ابن ابو حلموس - و حرب الباسوس راح السوق يشتري شنطة و كان فرحان ان البياع فسفوس يعرف ابوه : ابو حلموس
و قال طبيعي انه يكرمني و نعرف ايه هوه اللي جوه النفوس لكن عيب حلموس انه زي ابوه ابو حلموس بيتكلم بألاطة و عنجهية و شايف نفسه مميز عن كل الجاموس
حلموس المنحوس ما يعرفشي ازاي نده علي البياع : فسفوس و قال له بسرعة هات الشنطة اللي جنب الفانوس كده بكل سماجة وعلو و بكل معاني الغرور في القاموس
الراجل البياع : فسفوس , كان ناصح و فالح و قال هوه كل من معاه فلوس علي الناس يدوس مع ان الفلوس مع حلموس و الشنطة في السوق علي الرف اللي مش ممسوس
بص البياع : فسفوس الي حلموس ابن ابو حلموس و قال له مفيش عندي شنط للبيع و حوش عني كلامك و الناموس حلموس ابن ابو حلموس استغرب انه يترقض له طلب و جري علي ابوه ابو حلموس
حلموس وصل عند ابوه في المحل و عيط و اتشنج و شكي له عمايل البياع : فسفوس ابو حلموس زعل و زمجر و قال حد يعمل مع ابني كده - ده انا ابو حلموس و معايا الشهرة و الفلوس
و قال له : ما تزعلشي يا ابني ده البياع : فسفوس ده راجل منحوس هوه ما يعرفشي انت ابن مين ده انا حاخلي نهار اهله متعوس
و بالموبيل النوكيا اتصل و اتصل و دور علي الكونتاكت البيسلوس و مع مع كام نمرة من نمر الناس الكبرات اللي مليانين فلوس عرف يعمل خطة و حرب علي البياع : فسفوس و لا حرب الباسوس
و قال : ده انا حاخرب بيت البياع فسفوس و حاقفل له محله و حاخليه يبيع بدل الشنط, ملوخية و باتنجان عروس و شرف ابني حلموس لا اخليه يسرح بعربية يد يبيع فيها فول بالسوس
و فعلا عن طريق موبيلات و مكالمات و ماتشتهي النفوس و استغل كل اتصالاته مع كبير القادوس مع شوية هدايا علي كاميرا ديجيتال و كام قلم ذهبي كوروس
كبير القادوس بسرع اصدر تعليماته باحالة اوراق البياع فسفوس الي مجلس العفوس لقينا البياع فسفوس بعدها بيلف في الشوارع و بيشحت و ضاع مستقبله في الفاسوس وعلشان يغزي العين جاب مكانه ابن عمه محروس
و راح ابو حلموس يدور علي شنطة تانية لابنه حلموس اللي شبهه العيال الروس و هوبا ليصة لقينا حلموس مع شنطة ماركة من اوربا تدعي البيكاروس و ماشي يتعايق بيها و معلقها علي كتفه و لا شمس الشموس
و نجح ابو حلموس انه يجيب لابنه حلموس مع الشنطة مرافق خاص احسن و اشهر من ماكسيموس و الواد حلموس ابن ابو حلموس - لفترة من الزمن - ضربها طبنجة و بقي صوته اعلي من الناقوس
فترة من الزمن - تطول و الا تصغر - المهم انه عايش في عز و باكوس و ادي حال الدنيا و اللي ما بيرضاش بالمكتوب له يعيش مفروس
و اللي مش عاجبه يشرب من الكنال بالقلة او الايادي الحلموسية يبوس و توته توتة - و ما خلصتشي - حدوتة حلموس ابن ابو حلموس